O concelleiro do Partido Popular de Santiago, Adrián Villa, criticou hoxe en rolda de prensa o estado deplorable do transporte público na cidade, sinalando que a situación actual supón “un perigo para os usuarios e un importante burato no peto dos composteláns”. Segundo Villa, “cada día que pasa, resulta máis preocupante e grave a situación deste servizo”.
Villa lembrou que a finais de xullo, os propios traballadores da flota advertiron sobre o perigo das condicións dos autobuses, o que levou á retirada de catro vehículos dos que non funcionaba o aire acondicionado en plena onda de calor. “Os traballadores falaban sobre a situación da flota, á que definían de moi perigosa”, afirmou Villa.
Tamén mencionou a preocupación do comité de empresa debido ás constantes avarías, destacando a última ocorrida o 23 de xullo na Praza de Galicia, que causou un caos circulatorio. Villa atribuíu estes problemas á falta de mantemento, incluso nos 21 autobuses alugados polo BNG que supoñen un custo de máis de 100.000 euros ao mes.
En decembro de 2023, o Partido Popular solicitou unha auditoría externa para coñecer o estado da flota, pero segundo Villa, “esa auditoría non chegou”. O concelleiro subliñou que o contrato do transporte público está caducado desde 2016 e que, a pesar de promesas anteriores, o novo contrato aínda non foi remitido á Oficina Nacional de Avaliación.
Villa denunciou a falta de transparencia do goberno local e a súa decisión de investir en multamóbiles e grúas en lugar de mellorar o transporte urbano. “Queremos reiterar unha advertencia vertida no pasado pleno municipal: cando pase algo grave, eximirémonos de responsabilidades, porque só as ten o goberno nacionalista”, afirmou Villa.
Ademais, Villa sinalou problemas específicos como as incidencias na liña 6A ao aeroporto, fallos na aplicación Máis BUS, e a redución de frecuencias no verán, provocando queixas entre os veciños. “Transparencia é sacar á luz esa auditoría xa realizada segundo o goberno, pero nós volveremos a solicitar unha externa e independente, para coñecer a realidade”, concluíu.
