O concelleiro de Economía e Facenda do Concello de Santiago, Manuel César Vila, anunciou este mércores que o goberno compostelán (integrado por BNG e Compostela Aberta), tentará conseguir o apoio do resto de forzas políticas (PSdeG e PP) para aprobar o expediente de utilización de remanentes que levarán a un pleno extraordinario o mércores 31 de xullo.
Así o comunicou nunha rolda de prensa, celebrada na casa consistorial, na que presentou o contido dun documento que describiu como un expediente “rendible” e “realista”. “Imos tentar conseguir o apoio maioritario de todos os grupos políticos do pleno. Loxicamente, o noso socio principal é o PSOE e esperamos contar con el e que este expediente poida saír adiante”, declarou o político. Do mesmo xeito, comentou que nas últimas semanas o seu goberno “fixo un esforzo” para pagar as facturas pendentes do Concello cos remanentes de 2023 e que “tentará axilizar” o resto de pagos.
CONTIDO DA PARTIDA
O total da partida do remanente líquido de tesouraría é de 6.780.000 euros, que se prevé utilizar para “necesidades extraordinarias e urxentes”. O concelleiro mencionou que no contido da partida figuran, entre outros, a construción de novos pasos elevados, a reparación de muros tradicionais e a compra de mobiliario e maquinaria para a Casa das Máquinas de Santiago e o Centro Xove de Creación Cultural.
Na mesma liña, destacou que “unha das partidas máis importantes” é a adquisición dun inmoble na rúa Mazarelos, un edificio que César Vila cualificou como “singular” e de “interese público”, e que enmarcou nas políticas de defensa pública da vivenda, posto que pretende ser destinado ao aluguer.
