Ante a chegada da selección española á final da Eurocopa, o PP de Santiago solicitou ao Concello compostelán a instalación de pantallas xigantes na Praza Roxa para que a cidadanía poida seguir o encontro, programado para o vindeiro domingo ás 21,00 horas.
Así o trasladou nunha rolda de prensa celebrada este mércores o concelleiro do partido Popular de Santiago, José Ramón de la Fuente, quen considera a localización proposta como “un espazo céntrico, de fácil acceso e gran capacidade”.
“A posibilidade de ver a final nun ambiente comunitario, nun lugar público, fomentará o espírito de unión e compañeirismo entre os veciños e ofrecerá unha alternativa segura e controlado para persoas que desexen gozar do evento en compañía”, comentou o político.
Do mesmo xeito, solicitou ao BNG que se adopten todas as medidas de seguridade que se consideren necesarias e tamén a prestación de servizos sanitarios, co obxectivo de que a xornada se desenvolva con normalidade.
Por agora, o goberno local atópase “estudando a proposta”. Desta maneira o comunicou a concelleira de Festas, Pilar Lueiro, ao ser preguntada nunha roda para presentar a programación das Festas do Apóstolo.
