Sumar Terras de Compostela anunciou o seu apoio ás medidas tomadas polo goberno local para ilegalizar os pisos turísticos sen licenza e paralizar as licenzas para novos locais turísticos no Casco Histórico. Segundo a formación, estas accións son cruciais para fomentar o comercio de proximidade e garantir que a poboación local poida seguir formando parte do tecido social da cidade.
“Non se pode permitir que persoas que vulneran a normativa local se beneficien economicamente en detrimento das que respectan a lexislación”, afirman dende o partido. A formación sostén que a vivenda debe ser considerada un dereito e non “un negocio dunhas poucas persoas”, e urxe afrontar con valentía a problemática social derivada da falta de vivenda accesible en Compostela.
Ademais, Sumar Terras de Compostela criticou o que considera unha incoherencia na postura do secretario xeral do PSdeG en Compostela, Aitor Bouza, acusándoo de “facerlle o xogo” ao Partido Popular e de priorizar loitas de poder internas por encima dos intereses dos cidadáns de Compostela. A formación tamén condenou a falta de acción por parte do PP ante o desborde turístico e a perda de habitantes, que está a xerar un crecente malestar social.
