Si ou non, turismofobia ou control do fluxo turístico?. O presidente da Xunta sorprendeu este luns dando por válida a taxa turística que quere implantar o Concello de Santiago, sempre e cando, “cumpra os condicionantes”. Faino uns días despois de alertar sobre actitudes antiturísticas, ou abertamente “turismofóbicas“, nun foro diante da patronal turística.
Pero este luns, preguntado novamente por esta taxa e as críticas da alcaldesa de Santiago, Goretti Sanmartín, por non querer recibila para abordar esta cuestión, Rueda dixo que esa taxa aprobarase “se cumpre os condicionantes”, é dicir, a normativa a este respecto. “O que hai que facer é tramitar isto o antes posible para que se converta en lei“, dixo. Pero, para iso, volveu a pedirlle á rexedora que lle remita os informes pertinentes que avalan esa medida.
“Mantiven reunión con ela en outubre. Manterei reunións periódicas cando toque cos alcaldes. Pero xa naquela xuntanza quedaramos en que ía trasladarme unha documentación sobre a taxa turística, na liña de que o que se recadara revertera para fins xerais. Sigo agardando a que se me remita esa documentación”, dixo na rolda de prensa posterior ao Consello da Xunta.
Preguntado, ademais, polas novas normativas aprobadas en Santiago para prohibir a concesión de licencias a novos establecementos turísticos, o presidente galego non se opuxo á esta medida, “se está dentro da lei”. “Se se trata de ter máis postos de traballo e riqueza pois é unha decisión do concello”, indicou. Con todo, tamén quixo deixar claro que os negocios dánlle traballo á xente.
