A concelleira socialista Mila Castro confirmou que o PSOE compostelán apoiará a creación dunha comisión especial para o estudo do ciclo integral da auga que se someterá a votación no pleno da próxima semana do Concello de Santiago. En rolda de prensa, Castro mostrouse convencida de que o resultado dese estudo será o modelo de concesión privada que defendeu o Executivo de Sánchez Bugallo no pasado mandato. “Vai validar, porque a realidade é a que é, a posición que nós sempre mantivemos e demostrará que a señora Sanmartín equivocouse hai ano e medio cando bloqueou o novo contrato”, manifestou.
O informe do anterior Goberno, explicou a socialista, detalla que parte das canalizacións do municipio chegaron ao final da súa vida útil e cifraba en “ao redor de 100 millóns de euros” o investimento a realizar para a renovación e ampliación da rede. Por iso, defendeu que “o único necesario” sería que o executivo de Sanmartín actualizase o estudo económico aos actuais prezos de mercado para sacar a licitación un novo contrato. “O problema é que seguimos perdendo tempo e dilatando os prazos cando sabemos cal vai ser o final”, reiterou a concelleira socialista.
