O Concello de Santiago respondeu ás críticas do Partido Popular sobre a situación do Refuxio de Animais de Bando e asegurou que a evolución dos datos apunta a unha diminución no número de animais acollidos no centro. O executivo local tamén explicou que a suspensión do proceso para seleccionar a nova dirección se produciu por unha dúbida legal formulada por unha das entidades integrantes do padroado.
Segundo a información trasladada polo Concello a Xornal de Compostela, a tendencia no número de animais presentes no refuxio é descendente. No caso dos cans, o centro pasou de contabilizar 292 en 2023 a 250 en 2024, 238 en 2025 e 224 con data do 31 de maio de 2026. No caso dos gatos, as cifras foron de 257 en 2023, 253 en 2024, 271 en 2025 e 232 a 31 de maio de 2026.
O goberno local tamén sinala que no que vai de ano entraron no refuxio 240 animais, mentres que saíron 294, na súa maioría mediante adopcións. Con estes datos, o Concello busca rebater as acusacións do PP sobre a situación de saturación do centro e defende que a evolución recente mostra unha redución da presión sobre as instalacións.
A resposta municipal chega despois de que o concelleiro popular Adrián Villa solicitase a convocatoria urxente do Padroado do Refuxio de Bando para abordar a situación do centro, o proceso de selección da dirección e os investimentos pendentes. Villa acusou ao goberno local de “pasividade absoluta” e denunciou que o refuxio continuaba saturado, co mesmo número de operarios e sen executar actuacións acordadas no padroado.
Fronte a esas críticas, o Concello subliña tamén a recente creación de tres novos canís de seguridade. Segundo indica o executivo local, anteriormente o refuxio dispoñía dun único espazo destas características e agora conta con catro, o que supón multiplicar por catro este tipo de instalacións.
En relación coa selección da nova dirección do refuxio, o Concello explica que o procedemento estaba en marcha e que a primeira proba xa estaba convocada cando unha das entidades membros do padroado trasladou ao secretario unha dúbida de carácter legal. Ante esa situación, o proceso foi suspendido por precaución para que o tribunal puidese analizar a cuestión.
Na reunión dese órgano acordouse solicitar unha aclaración xurídica. Segundo o Concello, dado que a fundación non dispón de servizos xurídicos propios, a consulta foi remitida á Asesoría Xurídica do Concello de Santiago.
O PP cuestionara esta mañá esta suspensión e denunciara que se producise sen información previa aos membros do padroado. Villa tamén sinalara que, dende a finalización do contrato da anterior directora a finais de abril, as funcións de dirección recaen no concelleiro de Benestar Animal por designación da presidenta do padroado, a alcaldesa Goretti Sanmartín.
O goberno local, pola súa banda, sitúa a paralización do procedemento nun criterio de prudencia administrativa, á espera de aclarar a cuestión legal formulada durante o proceso. Polo momento, segundo a información facilitada, a resolución desa consulta marcará os seguintes pasos para retomar ou continuar a selección da dirección do Refuxio de Bando.
