O Grupo Municipal Socialista de Santiago criticou o estado no que quedaron as obras executadas polo Goberno local na vía principal de acceso ao Colexio de Educación Especial da Barcia, ao considerar que a actuación realizada non solucionou os problemas existentes e, segundo sostén, empeorou as condicións de mobilidade no entorno do centro.
A súa concelleira Marta Abal sinalou que antes da intervención a calzada xa presentaba diversas irregularidades e fochancas que, segundo indican, obrigaban ao alumnado e ás familias a extremar as precaucións nos desprazamentos, especialmente no caso das persoas usuarias de cadeiras de rodas. Porén, sosteñen que os traballos executados deixaron a superficie nun estado máis complexo para a circulación e consideran que a situación pode supoñer dificultades adicionais para o alumnado con mobilidade reducida.
Os socialistas cuestionan tamén a explicación ofrecida polo responsable municipal sobre o tipo de actuación realizada. Segundo indican, o concelleiro tería argumentado que se trata dunha vía con escaso tránsito e que, por ese motivo, non se consideraba necesaria unha actuación mediante asfaltado en quente. O PSdeG rexeita esa valoración e asegura que por esa estrada circulan diariamente autobuses escolares, vehículos de servizo e reparto, ademais das persoas usuarias vinculadas ao funcionamento ordinario do centro, que dispón de comedor e residencia.
Na súa valoración, o grupo da oposición considera que a situación evidencia unha falta de atención ás necesidades das persoas usuarias do centro educativo e ás condicións de accesibilidade do entorno. Ademais, aseguran compartir o malestar expresado pola ANPA do Colexio da Barcia, coa que afirman manter contacto continuado.
