A alcaldesa de Santiago, Goretti Sanmartín, avanzou que a nova proposta para a parcela de Peleteiro incrementará o 20 % de vivenda protexida que se barallaba en anteriores formulacións e lembrou que na licenza solicitada nestes momentos “non hai ningunha”. Tras manter un encontro o pasado venres co ministro de Economía, Carlos Cuerpo, a rexedora compostelá manifestou este luns en rolda de prensa que atopou “boa receptividade” por parte do representante do Executivo central, apostando “pola vivenda e por propor que houbese un cambio de usos para o ámbito de Peleteiro”.
O acordo, detallou, sinala que “a partir de agora vai haber reunións técnicas para fixar cal pode ser ese cambio no plan necesario”, pero inclúe “unha idea clara”: “Reducir o uso comercial e favorecer ese cambio de uso comercial por uso residencial, e onde, de maneira moi clara, poténciese a vivenda protexida”. Todo iso, coa condición de “non reducir a edificabilidade”. “Cando teñamos unha proposta onde encaixe este cambio de usos, que entendemos que é moi favorecedor, convocaremos a comisión de Peleteiro e daremos conta tanto ás asociacións de comerciantes, veciñais como aos diferentes grupos políticos da posibilidade de alternativa que teñamos encima da mesa”, relatou.
Sobre prazos, Sanmartín esgrimiu que o ditaminará o que se poida facer desde o punto de vista técnico, aínda que se comprometeu a “apurar todo o máximo posible”. “Antes de nada temos que ter unha proposta técnica que aprobar. A partir de aí, todo o proceso pódese facer en poucos meses, pero o fundamental é ter canto antes unha proposta técnica”, subliñou.
