A alcaldesa de Santiago, Goretti Sanmartín, realizou este venres unha valoración dos últimos plenos municipais nos que se aprobou a cuestión de confianza vinculada aos orzamentos e repasou as principais actuacións do Goberno local, ao tempo que respondeu ás críticas da oposición.
Durante a súa comparecencia, a rexedora iniciou a intervención cun ton reivindicativo ao afirmar: “Quero iniciar esta rolda de prensa declarándome culpable“. A partir desta idea, enumerou diferentes medidas impulsadas polo executivo municipal, entre elas a aprobación dun novo orzamento, o desenvolvemento urbanístico da parcela de Peleteiro con reserva de vivenda protexida ou a posta en marcha dun modelo turístico que definiu como “sustentable e consciente”.
Sanmartín destacou tamén avances noutros ámbitos como a creación dun centro integral para persoas sen fogar, a mellora do servizo de transporte urbano —que, segundo indicou, chegará a todas as parroquias— e o impulso de cambios na xestión de servizos como o ciclo da auga.
A alcaldesa incidiu en que o seu goberno está a traballar para “sacar adiante cuestións que son cruciais pro futuro de Compostela”, citando como exemplos a aprobación dos orzamentos, o desbloqueo de proxectos urbanísticos ou a mellora dos servizos públicos.
En relación coa aprobación da cuestión de confianza, agradeceu o apoio das concelleiras non adscritas e asegurou que actuaron con “altura de miras e responsabilidade”. Segundo explicou, o proxecto orzamentario aprobado “é exactamente o mesmo” que fora rexeitado inicialmente no pleno anterior.
CRÍTICAS AO PARTIDO POPULAR
A rexedora tamén respondeu ás críticas do líder do PP local, Borja Verea, ao que acusou de manter unha actitude de bloqueo político. Así mesmo, cualificou de “grave” a súa posición e denunciou o que considerou un ton “machista” nalgunhas das súas intervencións, sinalando expresións empregadas contra a súa persoa.
“Levo a moita honra ser culpable de defender o mellor para Santiago”, afirmou, ao tempo que acusou á oposición de priorizar “o poder polo poder”.
SENTENZA FAVORABLE POLO CONTRATO DE TRANSPORTE
No ámbito xudicial, Sanmartín informou dunha sentenza favorable ao Concello nun recurso presentado pola empresa concesionaria do transporte urbano, Tralusa. A resolución avala a penalización de 764.000 euros imposta á compañía por non acadar o número de persoas usuarias comprometido.
Segundo explicou, o contrato establecía un obxectivo de 7,4 millóns de viaxeiros, fronte aos algo máis de seis millóns rexistrados. A empresa recorreu esta sanción alegando o impacto da pandemia, mais a xustiza confirmou que a penalización foi aplicada correctamente.
A alcaldesa aproveitou para poñer en valor o labor dos servizos xurídicos municipais e sinalou que esta é unha das varias resolucións recentes favorables ao Concello, entre elas a inadmisión dun recurso do PP sobre o funcionamento dos plenos.
PRIORIDADES INMEDIATAS DO EXECUTIVO
Preguntada polas próximas actuacións, Sanmartín situou como prioridade a licitación do novo contrato de transporte urbano, actualmente en fase de análise das ofertas presentadas. Tamén destacou a necesidade de regularizar contratos municipais, mellorar infraestruturas e continuar coas reparacións derivadas dos danos causados polas borrascas do inverno.
Ademais, subliñou que a aprobación dos orzamentos permitirá activar subvencións para o tecido social, cultural e deportivo da cidade.
A alcaldesa concluíu sinalando que a superación da cuestión de confianza permitirá avanzar na execución das políticas municipais e considerou que este escenario “favorece a veciñanza de Santiago de Compostela”.
