A concelleira do Grupo Municipal Socialista, Marta Abal, cuestionou o proceso de elaboración do novo contrato de transporte urbano impulsado polo Goberno municipal de Santiago, ao considerar que se está a desenvolver sen a implicación previa da veciñanza.
Segundo explicou, o executivo liderado por Goretti Sanmartín estaría a presentar o modelo unha vez definidos os pregos e iniciado o procedemento administrativo, unha dinámica que cualificou como unha actuación “sen contar coa veciñanza” nunha decisión que afecta ao conxunto da cidade. Neste sentido, Abal afirmou que o Goberno local “volve actuar cunha lóxica de todo para o pobo pero sen o pobo”.
A edil socialista sinalou que a recollida de achegas cidadás se está producindo nun momento posterior á definición do contrato, amparándose —segundo indicou— na flexibilidade do modelo para introducir cambios. Porén, advertiu de que esta circunstancia non garante modificacións reais e puxo como exemplo a situación dalgunhas zonas do rural compostelán.
Abal incidiu en que o novo contrato, ao que cualificou como o de maior orzamento na historia do municipio, presenta deficiencias na cobertura, mencionando de maneira específica a parroquia de Busto, que —segundo indicou— quedaría sen servizo de transporte urbano.
Neste contexto, defendeu que unha decisión deste alcance debe contar cun proceso previo de diálogo coa cidadanía. “Unha decisión tan importante como o funcionamento do servizo de transporte público non pode tomarse de costas á cidadanía”, afirmou, ao tempo que subliñou que a orde do proceso participativo debería inverterse, escoitando primeiro as demandas veciñais e adoptando despois as decisións.
CHAMAMENTO A UN CAMBIO NO MODELO DE PARTICIPACIÓN
A concelleira socialista reclamou unha modificación na forma de xestionar este tipo de procesos, apostando por un modelo baseado no diálogo e na construción de consensos. Así, asegurou que “Santiago precisa un goberno que escoite antes de actuar, que dialogue e que conte coa xente desde o principio”.
Finalmente, Abal apuntou que a participación efectiva da cidadanía resulta clave para deseñar servizos públicos que respondan ás necesidades reais da poboación e garantan unha cobertura equilibrada en barrios e parroquias do termo municipal.
