A concelleira non adscrita de Santiago, Mila Castro, criticou a intención anunciada pola alcaldesa, Goretti Sanmartín, de que sexa a Xunta de Goberno Local quen decida o modelo de xestión para a renovación do contrato do ciclo integral da auga, sen que a decisión pase previamente polo pleno da corporación.
Castro cualificou a situación como “unha broma de mal gusto e a penúltima contradición da señora Sanmartín”, ao considerar que a proposta contradí o discurso que, segundo sinalou, a rexedora mantivera ata agora sobre a importancia de respectar as decisións adoptadas polo pleno municipal.
Segundo explicou a concelleira, no pasado mandato a corporación acordara que fose o pleno quen determinase o modelo de xestión deste servizo, tras un acordo que contou co apoio de diferentes grupos municipais. “O Pleno da Corporación Municipal decidiu no pasado mandato que fose ese órgano precisamente o que decidira o modelo de xestión”, lembrou.
CRÍTICAS AO CAMBIO DE CRITERIO
Castro sostivo que a decisión de trasladar agora a responsabilidade á Xunta de Goberno Local supón “incumprir un acordo plenario que a propia alcaldesa impulsou” e cuestionou o cambio de posición do Goberno municipal respecto á renovación do contrato.
Neste sentido, indicou que a alcaldesa “tiña moi doado aprobar este contrato no Pleno Municipal mudando o seu voto en contra por unha abstención”, algo que, segundo apuntou, non se produciu. A edil tamén fixo referencia ao papel doutros grupos municipais no proceso e lembrou que a proposta de renovación da concesión non prosperou polos votos en contra do actual Goberno local.
CUSTES E ESTUDOS PREVIOS
A concelleira non adscrita tamén criticou a xestión do proceso nos últimos anos e asegurou que o Executivo municipal gastou arredor de 80.000 euros nun estudo que, segundo afirmou, “non serviu para nada”.
Na súa opinión, o Goberno local deberá agora destinar novos recursos económicos para actualizar o estudo económico elaborado no mandato anterior, o que cualificou como unha mostra de “falta de responsabilidade sobre os fondos públicos”.
Castro lembrou que a renovación do contrato podería terse abordado hai máis de tres anos, cando, segundo explicou, solicitara o respaldo do pleno para iniciar ese procedemento.
ADVERTENCIA SOBRE POSIBLES CONSECUENCIAS
Finalmente, a concelleira advertiu de que adoptar unha decisión deste tipo sen respectar o acordo plenario podería xerar problemas xurídicos no futuro proceso de licitación. “Veremos se a inseguridade é xurídica, porque saltarse de xeito tan flagrante un acordo destas características poderá custar a paralización dunha futura licitación”, sinalou.
Castro cualificou a situación como “decepcionante” e insistiu en que a decisión sobre o modelo de xestión do servizo da auga debería adoptarse no pleno da corporación municipal, tal e como recolle o acordo aprobado anteriormente.
