O concelleiro do Grupo Municipal Socialista en Santiago, Sindo Guinarte, fixo balance este luns do funcionamento da Oficina de Queixas e Suxestións do Concello e asegurou que o ano 2025 rexistrou a porcentaxe máis baixa de resolución de expedientes da serie histórica recente.
Segundo explicou, a cidadanía pode trasladar as súas demandas e propostas a través da carpeta cidadá ou mediante escrito nos rexistros municipais, sendo posteriormente os distintos departamentos os encargados de emitir os informes correspondentes. A normativa fixa un prazo máximo de tres meses para dar resposta.
EVOLUCIÓN DAS QUEIXAS DENDE A PANDEMIA
Guinarte indicou que o número de reclamacións experimentou un aumento significativo a partir da pandemia. Ata 2020 a cifra situábase arredor das 500 anuais, mentres que nos exercicios posteriores se moveu entre as 600 e máis de 700. En 2025 contabilizáronse 610 queixas, unha cifra lixeiramente inferior á do ano anterior.
Porén, o edil centrou a súa intervención na taxa de resolución. En 2025, segundo os datos expostos polo PSdeG, só se resolveron o 40% das queixas e suxestións, o que implica que preto de seis de cada dez quedaron sen resposta. En termos exactos, a porcentaxe de expedientes pendentes situouse no 59,84%.
A comparativa cos anos anteriores amosa, segundo sinalou, unha evolución descendente: no 2022 a taxa de resolución foi do 80%; no 2023 do 61%; e en 2024 resolveuse o 55% das queixas, quedando sen tramitar o 44%, a segunda cifra máis alta da serie histórica.
DATOS POR ÁREAS MUNICIPAIS
O concelleiro socialista detallou tamén os datos correspondentes a 2025 por departamentos. Na área de Mobilidade e Seguridade, a que concentra maior volume de incidencias, rexistráronse 146 expedientes, dos que, segundo indicou, só un foi resolto.
En Urbanismo contabilizáronse 11 queixas sen que se resolvese ningunha; en disciplina urbanística, 2 de 24; en atención ao contribuínte, 5 de 26; e en parques e xardíns, 1 de 52.
Guinarte sostivo que estes datos contrastan co incremento de persoal directivo e de apoio administrativo nos departamentos municipais. Ao seu xuízo, a situación evidencia unha diminución da capacidade de resposta institucional.
CUESTIÓNS RELATIVAS Á TRANSPARENCIA
Na mesma comparecencia, o edil vinculou esta situación co que cualificou de carencias en materia de transparencia. Entre os exemplos citados, apuntou que as ordenanzas fiscais modificadas non figuran actualizadas na web municipal, que as retribucións e listaxes de concelleiros, persoal directivo e eventual permanecen sen actualizar desde 2024 e que, durante o actual mandato, non se publicou o dato do período medio de pagamento a provedores.
Para Guinarte, estes elementos evidencian deficiencias nos mecanismos de información pública e participación. “Menos propaganda e máis cumprir coas obrigas de transparencia e de dar resposta aos cidadáns que xa están establecidas polas propias normas municipais”, afirmou.
