O secretario xeral do PSdeG de Santiago, Aitor Bouza, reclamou esta mañá un incremento inmediato de 2,4 millóns de euros na achega da Xunta ao Consorcio de Santiago, co obxectivo de reforzar as políticas de rehabilitación no casco histórico compostelán.
Bouza situou a vivenda como unha das prioridades políticas actuais e defendeu a rehabilitación como ferramenta para ampliar a oferta residencial na capital galega. Segundo indicou, o acceso pasa tamén “a través tamén da rehabilitación de todas esas vivendas que precisan da axuda da propia Administración Pública”, co fin de que estean “en condicións óptimas de habitabilidade” e poidan incorporarse ao mercado, incluídas aquelas que se atopen baleiras e susceptibles de alugueiro.
O dirixente socialista lembrou que o PSdeG presentou emendas aos orzamentos autonómicos para incrementar en 2,4 millóns de euros a dotación destinada ao Consorcio, unha proposta que foi rexeitada polo Partido Popular. “Votaron en contra” e “o señor Borja Verea, que tanto di defender a esta cidade, votou en contra, co beneplácito, por suposto, do presidente da Xunta de Galicia”, afirmou, cuestionando a posición do PP respecto aos intereses de Santiago.
Durante a comparecencia, Bouza puxo o foco na execución orzamentaria da Xunta en materia de rehabilitación. Segundo sinalou, “dentro das súas propias competencias, o goberno galego deixou sen executar no ano 2025, a peche do terceiro trimestre, o 73% dos fondos no programa 451 que é o correspondente a rehabilitación da vivenda”. Ao seu xuízo, esta situación evidencia que “esa é a política da Xunta de Galicia. Nin fai, nin deixa facer”.
O deputado concretou que esta porcentaxe supón que “169 millóns de euros están nun caixón da Xunta de Galicia sen executarse para poder rehabilitar a vivenda pública”. Ademais, apuntou que no exercicio 2024 quedaron sen executar 81 millóns de euros, o que representa o 42,9% dos fondos destinados a este ámbito.
Fronte a estes datos, Bouza sostivo que a Xunta dispón de capacidade suficiente para reforzar o Consorcio compostelán. “A Xunta pode incrementar 2,4 millóns no Consorcio? Pode. Quere? Non”, declarou, instando ao presidente Alfonso Rueda a que adopte esa decisión “de maneira inmediata” e a que se implique “en igualdade de condicións” co resto das administracións que integran o organismo.
O secretario xeral do PSdeG de Santiago concluíu pedindo que o Goberno galego cumpra cos seus compromisos co Consorcio e intensifique as políticas de rehabilitación nun contexto no que o acceso á vivenda continúa a ser unha das principais preocupacións da cidadanía compostelá.
