O concelleiro do Partido Popular no Concello de Santiago, José Antonio Constenla, reclamoulle ao goberno municipal de BNG e CA que adopte medidas “de forma urxente” para resolver o estado de abandono da antiga oficina de turismo, actualmente situada na rúa Ramón Piñeiro.
Segundo explicou o edil popular, a situación actual do inmoble supón un risco para a seguridade das persoas, especialmente para as nenas e nenos que xogan nas inmediacións e para os viandantes que transitan a diario pola zona. Constenla instou ao executivo local a definir o futuro desta instalación e a intervir para evitar posibles accidentes.
O concelleiro lembrou que a estrutura, deseñada polo arquitecto Jorge Pegedelles, fora instalada con carácter provisional na Praza de Galicia, onde funcionou como punto de información turística desde o Xacobeo 2023. Tras o seu traslado á actual localización, afirmou, quedou sen uso e sen mantemento, o que provocou un deterioro progresivo do conxunto.
Constenla sinalou que no estado actual poden observarse elementos metálicos oxidados e cortantes, así como cristais rotos, sen que exista ningún tipo de peche que impida o acceso ao interior da estrutura. Ao seu xuízo, esta situación incrementa o perigo e evidencia a falta de actuación municipal sobre un inmoble que considera “case irrecuperable”.
Ademais, o edil popular fixo referencia ás advertencias trasladadas pola veciñanza, que alertan da entrada e saída de persoas da antiga oficina e de comportamentos que poderían indicar posibles actividades ilícitas no seu interior. Segundo indicou, estas circunstancias xeran unha crecente preocupación veciñal, ao atoparse o inmoble a escasos metros dun parque infantil e dun centro educativo.
Desde o PP reclaman ao goberno local que avalíe a situación e actúe con celeridade, tanto para garantir a seguridade no espazo público como para dar unha solución definitiva ao futuro da antiga oficina de turismo.
