As concelleiras non adscritas de Compostela reclaman ao goberno local unha resposta inmediata á crise aberta na xestión da rede de centros socioculturais, tras a renuncia da empresa Eulen a facerse cargo do servizo apenas dúas semanas despois de resultar adxudicataria do contrato de dinamización e mediación. A edil Mercedes Rosón propón un itinerario baseado no diálogo coa outra empresa concorrente, no acompañamento ao persoal afectado e na aplicación das penalizacións necesarias á anterior concesionaria para garantir o pagamento das catro nóminas e da paga extra pendentes.
Rosón apelou á “altura de miras e responsabilidade” tanto do goberno municipal como da oposición e considerou que “non solucionamos nada pedindo dimisións”, insistindo en que a prioridade debe ser ofrecer alternativas que eviten un maior deterioro do servizo. Neste contexto, puxo como exemplo a disposición amosada polo persoal, que nos últimos días anunciou a súa vontade de retirar a denuncia presentada pola aplicación do convenio estatal de ocio no canto do de eventos, a cambio de abrir unha negociación para establecer un convenio propio.
Segundo advertiu a concelleira non adscrita, a situación actual podería ter consecuencias directas sobre o funcionamento duns 30 centros socioculturais, que poderían verse obrigados a pechar se as monitoras, dependentes deste contrato, deixan de prestar servizo. A esta posibilidade engádese o risco de paralización das aulas de xogo, que cualificou como “un servizo fundamental para a conciliación de moitas familias”. Ante este escenario, reclamou dilixencia ao executivo local e “transparencia absoluta”, solicitando que este mesmo luns se produza unha comparecencia pública do concelleiro responsable para explicar as xestións realizadas desde a renuncia da empresa.
Un proceso prolongado no tempo
Aínda que insistiu en que non é momento de confrontación política, Rosón lembrou que a situación actual é o resultado dun proceso que se foi dilatando no tempo. Segundo indicou, o contrato foi prorrogado en dúas ocasións á anterior concesionaria a pesar dos reiterados incumprimentos das condicións laborais do persoal, ao tempo que se demorou “en exceso” a nova licitación. A propia edil xa reclamara en decembro de 2024 que se axilizase o procedemento, sen que esa petición tivese efectos.
“Está claro que se o servizo se licitara e adxudicara antes, non arrastrariamos todos os condicionantes que agora agravan a situación trala renuncia da nova adxudicataria”, sinalou Rosón, que reiterou a necesidade de actuar con rapidez para evitar un parón na actividade da rede de centros socioculturais de Concello de Santiago.
