O grupo municipal do Partido Popular de Santiago advertiu este martes do estado de abandono das ribeiras e regatos do municipio de Santiago de Compostela e reclamou actuacións inmediatas para evitar posibles asolagamentos en vivendas e propiedades da veciñanza. Segundo expuxo o concelleiro José Ramón de la Fuente, a acumulación de lixo, maleza e árbores caídas está a xerar puntos de risco en diferentes cursos fluviais da cidade.
O edil popular sinalou que esta situación se repite en distintos barrios e lembrou episodios recentes nos que a propia veciñanza tivo que actuar para retirar restos vexetais caídos preto das súas casas. Como exemplo, referiuse á contorna de Suarribas, onde residentes trataron de evitar un posible taponamento da ponte da Gradicela, unha circunstancia que, segundo indicou, xa provocou inundacións noutros anos.
Desde o PP lembran que no mes de febreiro do pasado ano o pleno municipal aprobou unha iniciativa do seu grupo para elaborar un plan de revisión e mantemento das ribeiras dos ríos, co obxectivo de garantir unha limpeza preventiva e periódica. Con todo, denuncian que transcorrido máis dun ano non se executaron actuacións de calado. De la Fuente asegurou que a situación actual pode comprobarse nas marxes do río Sar e do río Sarela, onde, segundo explicou, existen árbores e arbustos secos ou inertes que poderían desprenderse en calquera momento.
O concelleiro detallou que a proposta aprobada contemplaba identificar os puntos máis problemáticos, especialmente aqueles nos que os asolagamentos se producen de forma recorrente, e aproveitar os meses de verán para realizar tarefas de limpeza, roza e mantemento. O obxectivo, segundo indicou, era que antes do mes de setembro todas as beiras dos ríos estivesen revisadas e acondicionadas.
De la Fuente lamentou que, malia contar con tempo suficiente e con avisos tanto da veciñanza como da oposición, o goberno local non executase esas actuacións nin realizase labores preventivas na rede de sumidoiros e canalizacións. Ao seu xuízo, trátase dun problema recorrente que se repite cada inverno e que segue sen resposta efectiva por parte do executivo municipal.
Por último, o edil popular reclamou un compromiso público para acometer de maneira inmediata a limpeza das ribeiras, a retirada de árbores e restos vexetais, a revisión dos puntos críticos e o mantemento regular das infraestruturas hidráulicas da cidade, co fin de reducir riscos e mellorar a seguridade da veciñanza.
