O deputado no Parlamento de Galicia e secretario xeral do PSdeG de Santiago, Aitor Bouza, denunciou a falta de operatividade do helicóptero de emerxencias con base en Santiago de Compostela, unha situación que, segundo explicou, se prolonga desde hai máis de quince días.
Bouza cualificou este escenario como “absolutamente anómalo e gravísimo” e advertiu de que a ausencia do helicóptero non só afecta á seguridade cidadá, senón tamén á capacidade de resposta do sistema público de emerxencias, especialmente nunha área de referencia para a comarca compostelá e o conxunto de Galicia.
O deputado socialista reclamou explicacións inmediatas á Consellería de Sanidade e ao presidente da Xunta de Galicia, cuestionando a xestión dun servizo que considera esencial. Segundo indicou, non é admisible que a sanidade pública “estea durante 15 días sen un helicóptero tan necesario”, nun contexto no que este recurso resulta clave para a atención de urxencias e traslados sanitarios.
Bouza sinalou tamén que esta situación non é un feito illado, lembrando que a falta de operatividade do helicóptero con base en Santiago xa se produciu “de maneira reiterada” tanto na anterior adxudicación do servizo como na actual, en vigor desde o ano 2023. Ao seu xuízo, esta repetición evidencia problemas estruturais na xestión e no control do contrato.
Neste contexto, o responsable socialista anunciou que o PSdeG levará esta cuestión ao Parlamento de Galicia, onde reclamará explicacións públicas e medidas urxentes para garantir a dispoñibilidade inmediata dun helicóptero de emerxencias con base operativa en Santiago, polo menos mentres non se resolva a actual licitación do servizo.
Ademais, Bouza reclamou transparencia por parte do Goberno galego e considerou imprescindible informar á cidadanía sobre a situación real do servizo de helicópteros de emerxencias, así como sobre as medidas adoptadas para evitar novas interrupcións. Nesa liña, esixiu unha reacción inmediata da Xunta para asegurar o cumprimento dos contratos vixentes e reforzar os mecanismos de control sobre a empresa prestadora do servizo.
O deputado advertiu da gravidade do escenario actual e criticou a falta de resposta política, asegurando que non se pode “mirar cara outro lado ante unha situación absolutamente dramática”. Así mesmo, afirmou que o PSdeG continuará a fiscalizar a actuación da Consellería de Sanidade en defensa dos intereses da veciñanza e do correcto funcionamento dos servizos públicos.
