A concelleira do PP de Santiago, Olaya Otero, cualificou este venres de “farsante” a actitude da alcaldesa, Goretti Sanmartín, tras facer pública, segundo denunciou, unha iniciativa da Xunta de Galicia para presentar a Santiago de Compostela como Capital da Ciencia sen contar coa autorización nin co consenso das administracións implicadas.
Nun comunicado remitido aos medios, Otero afirmou que a alcaldesa incumpriu un acordo de confidencialidade existente arredor deste proxecto e acusouna de atribuírse publicamente unha iniciativa que, segundo indicou, non foi impulsada polo goberno municipal. “O comportamento da alcaldesa encaixa perfectamente coa definición de farsante da Real Academia Española: quen finxe o que non é”, asegurou a edil popular.
A representante do PP de Santiago sostivo que Sanmartín “pretendeu facerse pasar por impulsora dun proxecto que non lle pertence” e considerou que a súa actuación non é propia dunha alcaldesa, ao entender que a súa responsabilidade era ofrecer apoio institucional “con discreción e lealdade” a unha iniciativa cualificada como estratéxica a nivel autonómico.
Segundo Otero, a convocatoria dunha rolda de prensa para anunciar o proxecto sen avisar á administración que o promoveu supón unha quebra da confianza entre institucións. “Con esta actuación, Goretti Sanmartín non só rompeu un acordo de confidencialidade, senón que enganou deliberadamente á cidadanía e aos medios de comunicación”, sinalou.
Desde o PP local advertiron de que este tipo de comportamentos poden “poñer en risco proxectos estratéxicos para a cidade”, ao entender que se basean nunha falta de lealdade institucional. Neste sentido, a concelleira incidiu en que a cooperación entre administracións debe asentarse “na confianza e no respecto”, e non no “protagonismo político”.
Otero foi máis alá ao afirmar que, no caso de que Santiago perda esta oportunidade, a responsabilidade recaería “única e exclusivamente” sobre a alcaldesa, á que atribuíu unha actuación “irresponsable” e afastada do interese xeral da cidade. A concelleira concluíu reclamando “máis seriedade e máis respecto polo traballo alleo” na xestión de proxectos de ámbito supramunicipal.
