A concelleira do Partido Popular de Santiago, Yolanda Otero, vén de denunciar o estado da pavimentación da avenida do Burgo das Nacións, unha das vías con maior tránsito da cidade. Segundo indicou, trátase dun viario que dá servizo diario a un elevado número de persoas, tanto en desprazamentos en vehículo como a pé.
A edil popular anunciou que trasladará esta cuestión ao Pleno municipal desta semana e sinalou que os problemas no asfaltado son claramente visibles. De acordo coas súas declaracións, o deterioro da calzada provoca molestias constantes ás persoas condutoras e supón un risco engadido para a circulación.
Otero lembrou que esta avenida foi obxecto de traballos de pavimentación hai poucos meses e, malia iso, volve presentar fochancas e un firme en mal estado. Nese sentido, criticou a actuación do goberno local de BNG e CA, ao que acusou de aplicar solucións provisionais no mantemento urbano, especialmente en cuestións relacionadas cos servizos públicos e a conservación das vías.
Desde o grupo popular subliñan que a veciñanza de Santiago de Compostela merece unha atención continuada no coidado dos espazos públicos municipais. Por este motivo, Otero reclamou unha actuación inmediata na Avenida do Burgo das Nacións co obxectivo de mellorar a seguridade e o benestar das persoas usuarias desta vía.
A concelleira advertiu ademais de que esta situación non é un caso illado e esténdese a outros puntos da cidade, onde, segundo afirmou, se repiten problemas como asfaltados deteriorados, beirarrúas con lousas levantadas e desniveis que dificultan o tránsito de vehículos e peóns.
Otero insistiu en que cada incidencia sen resolver pode converterse nun perigo diario para condutores, ciclistas e viandantes, e asegurou que esta situación reflicte, ao seu xuízo, unha xestión municipal deficitaria no mantemento urbano.
