A alcaldesa de Santiago, Goretti Sanmartín, desvinculou este venres ao Concello do desaloxo do centro social okupado ‘Escarnio e Maldizer’, executado pola Policía Nacional no inmoble da rúa da Algalia de Arriba, e asegurou que se trata dun procedemento de carácter estritamente xudicial no que a administración local non ten competencias.
Preguntada por Xornal de Compostela polos cánticos escoitados durante a concentración, entre eles “Goretti, decide, apoias ou reprimes”, a rexedora afirmou que “todo o mundo sabe que o Concello non intervén en procedementos como este” e subliñou que se trata dun conflito de propiedade que segue a vía xudicial. “Non somos parte implicada, nós non temos competencias de conflitos de propiedade, neste caso”, indicou.
Sanmartín insistiu en que o goberno municipal non pode actuar neste tipo de procesos e reiterou que “non nos corresponde a nós un conflito que vai vía xudicial”. Segundo explicou, o papel do Concello queda fóra deste tipo de actuacións, ao non tratarse dunha cuestión da súa competencia.
En relación ao contido das consignas dirixidas á súa figura durante a protesta, a alcaldesa asegurou non coñecer o significado concreto ao que facían referencia. “Non sei. Isto é o que acontece en cantidade de cuestións”, sinalou, engadindo que en moitas ocasións a cidadanía dirixe as súas demandas á administración máis próxima. “Ás veces son cuestións doutras administracións ou de outras entidades que son competentes, e a xente todo o tempo é o Concello o que está máis próximo, o que está aquí e o que pode levar as responsabilidades”, apuntou.
O desaloxo do inmoble da Algalia de Arriba produciuse na mañá deste venres tras unha orde do Xulgado de Primeira Instancia número 2. Desde primeira hora, arredor de máis de medio cento de persoas concentráronse na Praza de Cervantes para protestar contra a actuación, cun despregamento policial que incluíu o corte de varios accesos no casco histórico. A mobilización desenvolveuse sen cargas nin incidentes.
O centro social ‘Escarnio e Maldizer’ viña desenvolvendo diversas actividades culturais e de lecer e fora ocupado por primeira vez en 2014. O colectivo denunciara nos días previos o que cualificaba como o desaloxo do “último centro social okupado urbano de Galiza”.
