O deputado socialista no Parlamento de Galicia e secretario xeral do PSdeG-PSOE en Santiago, Aitor Bouza, denunciou este xoves a situación de colapso das urxencias do Complexo Hospitalario Universitario de Santiago e esixiu a dimisión inmediata do xerente do SERGAS pola súa responsabilidade na xestión sanitaria.
Segundo expuxo, o estado das urxencias do hospital de referencia da comarca compostelá está a ter un impacto directo na atención á cidadanía e non pode seguir sendo tratado como un episodio illado. Bouza afirmou que “non podemos permitir que as urxencias sigan colapsadas e que a cidadanía siga sufrindo”, ao tempo que reclamou responsabilidades políticas pola situación que se está a vivir.
O deputado sinalou que o que acontece no CHUS é, ao seu xuízo, unha mostra da xestión sanitaria da Xunta de Galicia, fronte ao discurso do Executivo autonómico, que vén cualificando estes episodios como feitos puntuais. Neste sentido, asegurou que “hoxe comprobamos que son un problema estrutural e que afectan directamente á atención á cidadanía”, incidindo na reiteración destas situacións.
Bouza puxo tamén o foco na designación dos cargos directivos do sistema sanitario, responsabilidade que atribuíu á Xunta de Galicia. Segundo indicou, “vemos como se nomea a persoas incapaces de xestionar un ámbito tan esencial como a saúde da nosa comunidade autónoma e, en particular, da comarca de Compostela”.
Ante este escenario, o deputado socialista anunciou que continuará reclamando explicacións nas institucións e pediu ao presidente da Xunta, Alfonso Rueda, que “se implique de inmediato na solución deste problema”. Ao seu entender, resulta imprescindible adoptar medidas urxentes que permitan corrixir o colapso das urxencias do CHUS e garantir unha sanidade pública de calidade, que cualificou como un dos piares fundamentais do Estado do benestar.
