O portavoz do PP no Concello de Santiago, Borja Verea, compareceu este luns en rolda de prensa para valorar tanto a actualidade municipal como o balance presentado polo goberno local de BNG e Compostela Aberta para o ano 2026. A intervención estivo centrada no anuncio da instalación de máis radares na cidade e na previsión de incrementar de maneira significativa os ingresos por sancións, unha medida que o dirixente popular vinculou a un obxectivo recadatorio.
Segundo expuxo Verea, a previsión municipal de duplicar os ingresos por multas respecto de 2024 non responde a criterios de seguridade viaria. O portavoz do PP cuestionou que se xustifique a medida cando, segundo indicou, non se detectaron novos puntos negros nin un aumento de accidentes ou atropelos. “Se non hai afán recadatorio, a solución é moi sinxela: baixar o IBI na mesma cantidade que se incrementan as multas”, afirmou, insistindo en que así se demostraría que a prioridade é a seguridade e non a recadación.
Durante a súa intervención, Verea relacionou o incremento das sancións co que cualificou como aumento do gasto político no actual mandato. Nese sentido, asegurou que o número de asesores e altos cargos se duplicou desde a chegada do actual goberno, pasando de oito a quince asesores e de catro a dez directivos, aos que atribuíu retribucións de ata 75.000 euros anuais. O portavoz popular defendeu que unha redución destas partidas permitiría liberar recursos para servizos como a policía local, os bombeiros ou o transporte urbano, sen recorrer a máis multas.
O dirixente do PP tamén criticou o balance presentado polo executivo municipal para o vindeiro ano, ao considerar que non existe un proxecto común nin retos definidos. Neste contexto, cualificou como insuficiente o anuncio de que a alcaldesa reciba á veciñanza mediante citas limitadas a dous días ao mes, unha iniciativa que, ao seu xuízo, chega tras tres anos sen atención directa á cidadanía. “É unha tomadura de pelo”, afirmou, ao entender que a medida non responde ás demandas reais dos barrios.
Preguntado polos orzamentos municipais, Verea indicou que o seu grupo non recibiu ningún borrador e sinalou que o goberno local debe negociar as contas cos grupos que sosteñen o executivo. O portavoz popular subliñou que o PP conta cun proxecto alternativo de cidade, afastado do modelo que, segundo dixo, representan BNG, Compostela Aberta e PSdeG, e reiterou que as prioridades orzamentarias do seu grupo serían “completamente diferentes”.
Na quenda final, Verea insistiu en que, de existir unha verdadeira preocupación pola seguridade viaria, os radares deberían instalarse unicamente en zonas con maior sinistralidade, algo que, segundo indicou, non se corresponde coa situación actual da cidade. O portavoz concluíu reafirmando a posición do PP como alternativa de goberno e asegurou que manterá unha postura “unida e constante” en asuntos como o contrato da auga ou o transporte urbano no Concello de Santiago de Compostela.
