O Grupo Municipal Socialista denunciou este xoves a falta de actuacións do goberno local de Santiago de Compostela para mellorar a seguridade viaria na parroquia de Laraño, tras rexistrarse dous accidentes de tráfico nun intervalo inferior ás 24 horas nun punto no que, segundo lembran, o executivo municipal se comprometera a intervir hai dous meses.
A concelleira socialista Marta Abal afirmou que no pleno municipal celebrado o pasado mes de novembro, e en resposta a unha pregunta do PSdeG, o goberno presidido pola alcaldesa Goretti Sanmartín asegurou que se adoptarían medidas de mellora viaria nesta parroquia. Porén, segundo sinalou, non consta que se executase ningunha actuación dende entón.
Abal advertiu de que a ausencia de intervencións está a ter consecuencias directas para a veciñanza. “O pasado mes de novembro, o goberno municipal comprometeuse a implementar medidas de mellora viaria na parroquia de Laraño. A día de hoxe non temos constancia de que se teña executado ningunha actuación ao respecto. As consecuencias desta inacción son evidentes: dous accidentes rexistrados en menos de 24 horas”, declarou.
Dende o PSdeG consideran que a situación require unha resposta inmediata por parte do executivo local. A concelleira insistiu en que resulta “urxente” que o goberno municipal asuma as súas responsabilidades e adopte de inmediato as actuacións necesarias para reducir o risco, especialmente tendo en conta que existe un informe da Policía Local, solicitado pola propia alcaldía, no que se recollen propostas para mellorar a seguridade na zona.
O grupo socialista subliñou que o incremento da sinistralidade na parroquia fai evidente a necesidade de actuar sen máis demora. “Non actuar non é unha opción. O risco é claro e crecente á vista do aumento da sinistralidade, e require unha resposta inmediata por parte do executivo municipal”, rematou Abal.
