A concelleira do PSOE no Concello de Santiago de Compostela, Marta Abal, centrou a súa intervención no pleno extraordinario deste luns na defensa do voto favorable do seu grupo aos recoñecementos extraxudiciais de crédito, apelando á responsabilidade institucional e á necesidade de evitar danos ás empresas que traballan para a administración local.
Segundo expuxo, os socialistas manteñen desde hai meses unha posición clara neste asunto, ao considerar que non se pode “dar unha bofetada ao Goberno na cara das proveedoras e proveedores do Concello de Santiago de Compostela”. Nesa liña, Abal explicou que o apoio do PSOE responde á coherencia coa actuación desenvolvida desde o inicio do mandato e á vontade de garantir o cobro de servizos xa prestados.
A edil subliñou que nos expedientes sometidos á consideración do pleno queda acreditado que “as prestacións se realizaron efectivamente, foron recibidas e constan conformadas por parte das técnicas e técnicos municipais”, polo que, ao seu xuízo, non existen dúbidas sobre a realidade dos traballos nin sobre a obriga de pagamento por parte do Concello.
Fronte a isto, Marta Abal cuestionou o posicionamento do resto da oposición, ao que cualificou de “obstrucionista”, e advertiu de que esta actitude non ten efectos sobre o goberno municipal, senón que repercute directamente nas empresas provedoras e, en última instancia, no conxunto da cidadanía compostelá. A concelleira insistiu en que atrasar ou bloquear estes pagamentos supón prolongar unha situación que afecta á normalidade na relación entre o Concello e o seu tecido empresarial.
