O Grupo Municipal Socialista de Santiago de Compostela presentou unha proposición ao Pleno municipal para denunciar a situación que atravesa o Colexio Público de Educación Especial A Barcia e reclamar a adopción de medidas urxentes por parte das administracións implicadas. A iniciativa busca instar tanto ao Concello de Santiago, gobernado por Goretti Sanmartín, como á Xunta de Galicia, presidida por Alfonso Rueda, a actuar de maneira coordinada para dar resposta aos problemas existentes no centro.
Segundo explicou a concelleira socialista Marta Abal, o colexio presenta graves deficiencias de accesibilidade, así como problemas de seguridade nos accesos e un contorno urbano que non está adaptado ás necesidades do alumnado, especialmente aquel con mobilidade reducida. A edil advertiu de que se trata dunha situación prolongada no tempo e coñecida polas administracións competentes.
Abal sinalou que, tal e como trasladaron as familias, a dirección do centro e a comunidade educativa, os accesos ao colexio levan anos sen cumprir as condicións necesarias para garantir a seguridade do alumnado. Ademais, apuntou que o viario municipal e as prazas de estacionamento resultan insuficientes, o que dificulta o día a día das familias e do persoal educativo.
A concelleira socialista cualificou a situación de inxusta e insistiu na necesidade dunha resposta inmediata. “É imprescindible que Concello de Santiago e Xunta de Galicia actúen de maneira coordinada e urxente, cada un no ámbito das súas competencias”, afirmou, ao tempo que lembrou que as reclamacións das familias se veñen producindo desde hai anos sen que se producise unha solución efectiva.
Desde o PSOE subliñan que a proposición que se levará ao Pleno municipal pretende garantir unhas condicións axeitadas para o alumnado do centro. En palabras de Marta Abal, “estamos a falar de garantir condicións dignas, seguras e accesibles para nenos e nenas que merecen toda a protección das administracións públicas”, unha responsabilidade que, segundo defenden, require dunha actuación conxunta e inmediata das institucións implicadas.
