O Grupo Municipal Socialista de Santiago instou á alcaldesa, Goretti Sanmartín, a asumir responsabilidades políticas pola situación que cualifica de crítica nos servizos de Policía Local e bombeiros, que, segundo denuncia, levan semanas funcionando con persoal insuficiente e sen medidas eficaces que garantan a seguridade da veciñanza.
O portavoz socialista, Gumersindo Guinarte, trasladou estas críticas a través dunha nota de prensa na que asegura que a falta de efectivos está a afectar de maneira directa á prestación de servizos esenciais. Como exemplo, referiuse ao sucedido este pasado domingo, coincidindo coa manifestación contra o proxecto de Altri, cando a quenda da Policía Local, que estaba prevista con oito axentes, funcionou finalmente con só dous efectivos, un inspector e un oficial, tras comunicar os outros seis a súa “indisposición” en distintos momentos.
Segundo Guinarte, este feito non pode entenderse como un caso puntual. “Este episodio non é illado, é o resultado dunha xestión insuficiente e dunha crise que se arrastra desde hai semanas. Non podemos permitir que a seguridade da cidadanía dependa da improvisación ou do persoal externo”, afirmou.
O portavoz socialista reclamou así á alcaldesa que adopte decisións inmediatas e que asuma as súas responsabilidades á fronte do Goberno local. “Criticar aos traballadores municipais non é unha saída: garantir os servizos públicos é unha obrigación que o Goberno non está a cumprir”, subliñou.
Desde o PSdeG lembran ademais que xa puxeron sobre a mesa propostas concretas, que contan, segundo indican, con amparo legal e respaldo sindical, e consideran que o único que falta é que o Executivo municipal dea o paso para aplicalas. Para os socialistas, estas medidas permitirían que os servizos esenciais funcionen nas condicións que “merece a cidadanía”.
“Non podemos normalizar o inaceptable. A cidade merece servizos fiables e unha xestión responsable”, concluíu Guinarte.
