O secretario xeral do PSdeG de Santiago de Compostela e deputado autonómico, Aitor Bouza, expresou este venres o seu respecto pola decisión da secretaria de Igualdade do partido, Silvia Fraga, de presentar a súa dimisión tras a denuncia por acoso sexual contra o xa expresidente da Deputación de Lugo, José Tomé Roca. Non obstante, Bouza defendeu que a organización socialista actuou “con dilixencia, contundencia e rapidez” desde o momento en que tivo coñecemento dos feitos.
Bouza explicou que o PSdeG activou de inmediato o protocolo interno e que, unha vez que a dirección galega foi coñecedora da denuncia, “non pasaron nin 24 horas para que o señor Tomé fose absolutamente apartado, dentro do que o partido pode, de todos os seus cargos orgánicos e institucionais”.
Segundo o dirixente socialista, a prioridade foi en todo momento a protección da vítima. “Fíxose todo o que se podía dentro da dilixencia necesaria para protexer á vítima, que era o máis importante, e para actuar con contundencia e rapidez, porque máis rapidez, neste caso, non se pode”, afirmou.
Bouza indicou tamén que respecta “todas as posturas e todas as opinións” xeradas arredor deste asunto e lembrou que, máis alá da decisión persoal de Silvia Fraga, “hai corenta e pico persoas máis na Executiva galega que tamén demostran que houbo ese apoio” á vítima.
Durante a súa intervención, o secretario xeral do PSdeG compostelán quixo marcar distancias con calquera comportamento machista. “O Partido Socialista é moito máis que puteros, porcos, machistas e calquera persoa que teña unha conduta contra unha muller, porque evidentemente o PSOE non é iso, é todo o contrario. Somos todas e todos os militantes que apostamos pola igualdade”, declarou, reiterando o apoio do partido ás vítimas e a súa condena de calquera actitude machista.
A dimisión de Silvia Fraga produciuse este venres, segundo confirmou a dirección do PSdeG, debido a un desacordo cunha nota interna enviada o primeiro día en que transcendeu o caso. Fraga non foi consultada sobre a redacción dese comunicado, no que tampouco se facía referencia á súa figura, aparecendo unicamente a responsable de Organización do partido, Lara Méndez.
Finalmente, Bouza agradeceu o traballo desenvolvido por Fraga á fronte da Secretaría de Igualdade e mostrou o seu convencemento de que “seguirá facendo unha importante labor pola igualdade e polo feminismo”, tanto dentro como fóra das responsabilidades orgánicas do partido.
