A alcaldesa de Santiago, Goretti Sanmartín, repasou esta mañá no programa ‘Hoy por hoy Santiago’ da Cadena Ser varios dos asuntos, a poucos días dun novo pleno, que marcan a actualidade municipal.
Por unha banda, Sanmartín explicou que o Executivo enviou xa unha nova proposta de acordo aos representantes sindicais de policías locais e bombeiros e que a resposta chegará na reunión prevista para este xoves ás 13:00. Segundo indicou, o Concello quere dar marxe para que os sindicatos analicen “con calma” o documento, que afecta tanto a cuestións legais como económicas. “Hai vontade de chegar a acordos”, afirmou, lembrando que moitas das reivindicacións “veñen de atrás” e están condicionadas pola falta de reposición de persoal.
Sobre as horas extra, a rexedora destacou que esta semana se abonarán as pendentes, mais evitou anticipar se volverán realizarse de inmediato: a prioridade —dixo— é avanzar na negociación e garantir que os servizos estean cubertos. Indicou que, malia a situación, o Concello conta agora cun volume de persoal que permite atender as incidencias cotiás.
No plano fiscal, a alcaldesa confirmou que a suba da taxa de recollida do lixo non irá finalmente ao pleno ordinario desta semana. O Goberno local opta por adiar a votación, á espera de que o PSOE e os concelleiros non adscritos “reflexionen” e valoren un posible acordo. Defendeu que o incremento é unha obrigación marcada pola normativa estatal e polos efectos do imposto autonómico dos residuos —ao que se referiu como “taxazo”—, un escenario que, sinalou, xa está levando a outros concellos a actualizar as súas ordenanzas. Sanmartín advertiu de que non aprobar a ordenanza pode traer sancións ou impedir o acceso a determinados fondos, polo que apelou á “responsabilidade” da oposición.
Durante a conversa, tamén abordou o pronunciamento da Xunta de Facultade de Medicina, que recentemente rexeitou o acordo da Xunta para a descentralización do grao. Sanmartín amosou a súa preocupación e lembrou que para Santiago é fundamental que se preserve o carácter de referencia da Facultade de Medicina existente. O Concello mantén que calquera pacto debe garantir a súa excelencia e evitar decisións que poidan debilitar o sistema universitario galego. Quedará agora pendente do Consello de Goberno da USC, que debe posicionarse este venres.
RELEVO NA FISCALÍA XERAL DO ESTADO
A rexedora referiuse ao relevo na Fiscalía Xeral do Estado e á concentración celebrada o domingo na Praza do Obradoiro en apoio a Álvaro García Ortiz. Sanmartín recoñeceu que existe unha “decepción social” co sistema xudicial, trasladou os seus desexos de éxito á nova fiscal xeral e expresou a esperanza de que a cidadanía recupere confianza na xustiza.
A alcaldesa marchou cun último chamamento: mobilizarse este 25 de novembro contra a violencia machista, un tema no que destacou a importancia da prevención entre a mocidade e das campañas centradas na violencia dixital.
