O portavoz do Partido Popular de Santiago, Borja Verea, lanzou unha dura crítica contra o goberno municipal de BNG e Compostela Aberta, encabezado pola alcaldesa Goretti Sanmartín, ao que acusou de provocar “un ambiente completamente irrespirable e tóxico” na cidade. “Goretti Sanmartín estalle facendo moito dano a Santiago”, declarou, engadindo que o executivo local “está poñendo en risco a vida dos santiagueses por pura neglixencia”.
Verea sostivo que a capital galega “vive unha situación terceiromundista” e que o goberno local “non dá respostas nin solucións en ningún departamento”. O dirixente popular asegurou que “BNG e Compostela Aberta teñen un modus operandi ben coñecido: limpar a súa incompetencia manchando o prestixio dos funcionarios municipais”. Nesa liña, referiuse á recente decisión de suspender permisos, vacacións e días propios na Policía Local, obrigando ao persoal a realizar horas extra, medida que cualificou de “decretazo en contra dos dereitos dos traballadores”.
O líder do PP compostelán tamén acusou o executivo municipal de actuar movido por “falta de coñecemento e preparación”. “Non poden escudarse na mala sorte. Hai tres anos que gobernan e o Concello segue colapsado”, afirmou. Ademais, reprochou ao goberno local o mantemento dun equipo de “25 asesores e altos cargos” que, ao seu xuízo, “funciona como un chiringuito” e impide asumir responsabilidades políticas.
En relación coa situación do corpo de Policía Local e dos Bombeiros, Verea sostivo que o goberno municipal “nin coñece a regulación que permite contratar máis persoal nin mostra vontade de chegar a acordos”. Indicou que a taxa de reposición é acumulativa e que a lei “permite contratar máis policías”, polo que considerou “inxustificable” que o Concello repita que non pode ampliar cadros de persoal. “Outras cidades o están facendo, pero aquí prefiren crer a súa propia mentira”, sentenciou.
Finalmente, o portavoz popular referiuse ao retraso dun ano no pagamento das horas extra, denunciando que o importe pendente é “equivalente ao gasto dos asesores contratados a dedo”. Segundo Verea, esta circunstancia “demostra que o problema non é de diñeiro, senón de xestión”, a pesar de que o Concello “dispón dos orzamentos máis altos da historia da cidade”.
