O Grupo Municipal Socialista de Santiago reclamou ao Goberno local que garanta o servizo de saneamento na zona da Curuxeira, unha demanda veciñal que —segundo lembran— leva anos sen resposta. A concelleira Marta Abal advertiu de que “o saneamento é un servizo básico que a administración local debe garantir aos seus veciños e veciñas”.
Abal explicou que a veciñanza da Curuxeira leva tempo solicitando unha rede de saneamento “que dea servizo a todas as vivendas e poña fin aos vertidos de augas fecais”. Segundo a edil, os desbordamentos actuais da rede de Teo provocan contaminación ambiental, riscos para a saúde e danos nos ecosistemas da contorna.
Para dar resposta a esta situación, o grupo socialista presentou un rogo no Pleno de outubro co fin de que o Concello inclúa esta actuación na súa planificación municipal e garanta a súa execución en 2026. “Desde o Grupo Municipal Socialista traballamos para cumprir os compromisos co rural. Por iso presentamos este rogo para que a Curuxeira conte con saneamento no ano 2026”, sinalou Abal.
A concelleira indicou que a solución podería materializarse mediante a construción dunha infraestrutura propia ou a través dunha infraestrutura compartida co Concello de Teo, que permita conectar as vivendas á súa rede.
Abal concluíu que o obxectivo dos socialistas é “acabar cos vertidos, garantir servizos básicos para os nosos veciños e veciñas e protexer o rural compostelán”.
