A concelleira do Partido Popular de Santiago, Olaya Otero, instou este mércores á alcaldesa Goretti Sanmartín a manifestarse publicamente contra as palabras da deputada do BNG, Montse Prado, quen se referiu á recente premio Nobel da Paz, María Corina Machado, como “fascista”.
Segundo declarou Otero, “dende o PP de Santiago condenamos rotundamente este tipo de comportamentos, impropios de quen forma parte dunha institución que debe ser exemplo de respecto e convivencia democrática”. A edil popular cualificou as declaracións da parlamentaria nacionalista como “unha gravísima falta de respecto cara a unha muller que loita pola liberdade e a democracia real no seu país e que pon en risco a súa seguridade persoal”.
A representante popular cuestionou tamén a postura do grupo municipal do BNG e pediu coñecer “cal é a opinión do Bloque en Santiago e se á alcaldesa lle parece normal o comportamento da súa compañeira no Parlamento”. Para Otero, o recoñecemento internacional a María Corina Machado “é unha excelente noticia non só para Venezuela, senón para calquera persoa que se considere demócrata”.
A concelleira asegurou que o acontecido “é de extrema gravidade” e lamentou que “non sexa a primeira vez que o BNG recorre a descalificacións e faltas de respecto cando algo non é do seu agrado”. Finalmente, preguntou se Goretti Sanmartín “vai estar á altura do seu cargo e condenar estas palabras, ou optará por gardar silencio cómplice ante o sectarismo e a intolerancia”.
