O conselleiro de Presidencia, Xustiza e Deportes, Diego Calvo, celebra o novo voo directo entre Santiago de Compostela e Nova York, xa que “poderán ir moitos galegos a Nova York e, sobre todo, moitos americanos que veñan a Galicia”. “E isto vén un pouco a mostrar que a promoción que fai Galicia no exterior funciona”, afirma.
“Estamos a promocionar Galicia en moitos países para que veñan eses turistas a Galicia”, valora.
Sinala que “proba diso” é que “o país que máis peregrinos achega de fóra de España é Estados Unidos”, posto que “a maior parte de peregrinos estranxeiros que veñen” fano desde de Estados Unidos, “e iso é fundamentalmente pola promoción que fai Galicia do seu destino en terras americanas”.
“Por tanto, é unha boa noticia, isto anímanos a seguir traballando, e tamén é unha mostra de que se pode conseguir que veñan aerolíneas a Galicia”. “E pedímoslle a AENA, e tamén ao Goberno de España, que actúen” para que “sigan vindo distintas aerolíneas aos aeroportos de Galicia”.
Esta conexión directa con Nova York, a través da aerolínea United Airlines, comezará a operar o 28 de maio de 2026 e funcionará tres días á semana.
