Os catro concelleiros non adscritos do Concello de Santiago —Gonzalo Muíños, Mercedes Rosón, Mila Castro e Marta Álvarez— presentaron este xoves as súas liñas de traballo para os próximos meses, co obxectivo de “pasar páxina” do debate político arredor dunha posible moción de censura.
A través dun vídeo difundido nas súas redes e dun comunicado, o grupo indicou que centrará a súa acción en cuestións como a xestión dos fondos europeos destinados á zona norte do municipio e a gobernación do recadado pola taxa turística. A iniciativa chega o mesmo día en que o Partido Popular se amosou disposto a apoiar unha moción de censura encabezada por Mercedes Rosón, unha posibilidade que a exedil socialista rexeitou de forma rotunda.
Muíños iniciou a intervención criticando que o debate político “leve máis dunha semana centrado en soños húmidos, en lugar de falar de políticas municipais e mellorar os servizos públicos”. Pola súa parte, Marta Álvarez lembrou a importancia de vixiar a execución dos proxectos europeos vinculados a Entre Sar e Sarela, entre eles o barrio verde de Pontepedriña e a renaturalización das lagoas de Cornes e do Auditorio.
Álvarez advertiu que “a mala xestión xa provocou a perda de dous millóns de euros para a Praza de Abastos no que levamos de mandato”, polo que insistiu en manter unha fiscalización activa sobre estes investimentos.
Tamén Mila Castro puxo o foco na taxa turística e anunciou que o grupo comezará nos vindeiros días unha rolda de encontros con asociacións locais “para garantir unha boa gobernación destes fondos, imprescindibles para que o turismo contribúa ao mantemento do concello”.
Pola súa parte, Mercedes Rosón subliñou que o grupo orientará o seu traballo a mellorar o mantemento das rúas, impulsar o cumprimento dos acordos orzamentarios e fomentar investimentos nos barrios e no rural, sen deixar de lado as políticas sociais. “As nosas prioridades son outras e os nosos soños tamén. Nós soñamos cun Santiago mellor”, afirmou, engadindo que “é o que ten estar afiliadas só a Santiago”.
Os edís non adscritos lembraron, ademais, a súa proposta de 12 medidas que o goberno local debería executar antes de rematar o ano, formulada xa no mes de setembro, e reafirmaron a súa intención de centrarse na “xestión e mellora da cidade”, afastándose das especulacións políticas sobre cambios no goberno municipal.
