A corporación municipal de Santiago de Compostela aprobou no primeiro pleno do curso político o pagamento de dúas facturas pendentes do servizo de bus urbano por un importe total de arredor de 3 millóns de euros. O acordo contou cos votos a favor de BNG, Compostela Aberta, PSOE e os concelleiros non adscritos, mentres que o PP mantivo o seu voto en contra.
As facturas corresponden a 402.093,27 euros a Autocares Rías Baixas e a 2.537.725,89 euros a TRALUSA, ambas bloqueadas nos meses previos ao verán. En maio e xuño non prosperaran polo rexeitamento do PP e a abstención das edís non adscritas, pero neste pleno o cambio de sentido de voto destes últimos permitiu desbloquear a situación.
O concelleiro de Mobilidade, Xan Duro, atribuíu o atraso ao “descabezamento do departamento de Tráfico” e asegurou que o expediente está completo. Desde as filas non adscritas, Gonzalo Muíños xustificou o apoio en dous compromisos: que se acreditase que as cantidades a pagar se axustan a prezos de mercado e que a nova licitación do transporte urbano estea lista este outono. “Estamos dispostos a facelo por responsabilidade, por empatía coas empresas e, sobre todo, coas persoas traballadoras que dependen destas facturas para cobrar”, explicou.
Este argumento xerou discusión co grupo popular, cuxa portavoz María Rosario Ferreiro cuestionou a existencia do informe económico presentado e acusou o goberno de “perpetuar irregularidades” na xestión do bus urbano. O tamén popular Borja Verea reprochou que se anuncie a incorporación de documentos “a posteriori”. Tanto Duro como a alcaldesa Goretti Sanmartín defenderon que se trata dun expediente completo, igual que en anteriores recoñecementos extraxudiciais.
Pola súa parte, a socialista Marta Abal ratificou o apoio do seu grupo e advertiu de que non se pode “deixar de pagar servizos prestados”, insistindo en que o escenario é o mesmo ca noutros casos xa aprobados.
