O BNG instou a garantir un servizo médico público e permanente no aeroporto de Santiago de Compostela a través dunha iniciativa rexistrada no Congreso dos Deputados. O deputado nacionalista Néstor Rego alertou da situación actual, que considera insuficiente, e pediu á entidade xestora aeroportuaria Aena que adopte medidas inmediatas para reforzar a atención sanitaria no Rosalía de Castro.
Rego advertiu de que o recorte de persoal facultativo no aeroporto pode supoñer riscos en situacións de emerxencia, e puxo como exemplo a asistencia prestada o pasado 27 de agosto a un menor con problemas respiratorios, un suceso que, segundo explicou, “permite exemplificar a importancia do servizo médico e pon de manifesto as súas actuais deficiencias”.
Desde o grupo parlamentario nacionalista entenden que a presenza de profesionais sanitarios de forma continuada é fundamental nunha infraestrutura pola que pasan miles de pasaxeiros cada día. Por iso, consideran necesario que se garanta unha cobertura médica estable, con medios suficientes para facer fronte a posibles incidencias tanto no interior do aeroporto como nas instalacións anexas.
O BNG defende que a prestación deste servizo debe ser pública e permanente, co obxectivo de garantir a seguridade dos viaxeiros e traballadores. A súa reclamación será debatida no Congreso, onde instan ao Goberno a instar a Aena a reforzar e consolidar os recursos sanitarios no Rosalía de Castro.
