O concelleiro do Partido Popular en Santiago, Adrián Villa, instou ao executivo municipal do BNG a repoñer a marquesiña da rúa Morón, situada diante do Complexo Deportivo Santa Isabel, que foi retirada hai nove meses logo dun accidente de tráfico. O edil considera que “non é de recibo que se tarde máis de medio ano en repor unha marquesiña, sobre todo pola súa proximidade ao polideportivo e pola recollida de escolares e veciños da contorna”.
Segundo os populares, é comprensible que a estrutura fose retirada no momento do sinistro polos danos sufridos, mais cuestionan a demora na reposición. Villa advertiu de que a necesidade é urxente ante o inminente comezo do curso escolar e a chegada do outono, cando resulta esencial dispor dun espazo para resgardarse da choiva mentres se agarda polo autobús.
O edil aproveitou tamén para reclamar un mellor mantemento das marquesiñas existentes na cidade, ao detectar “danos en cristais e estruturas, ademais de deficiencias na limpeza”. Engadiu que existen paradas que levan anos solicitando este tipo de instalacións, o que considera “unha débeda histórica coa veciñanza que agarda o autobús sen contar con protección fronte ás inclemencias do tempo”.
Por outra banda, Villa volveu pór sobre a mesa a situación da parada de autobús da rúa do Hórreo, próxima á estación Intermodal, dende onde sae a liña 6A cara ao aeroporto da Lavacolla. Segundo explicou, trátase dunha das paradas con maior demanda e só dispón dunha marquesiña que “sempre está ateigada de xente”.
“Non é de recibo que o BNG dea as costas a veciños, visitantes e persoas doutros concellos limítrofes”, subliñou Villa, quen lembrou que as solicitudes para ampliar esta infraestrutura xa foron reiteradas en numerosas ocasións.
