O barrio dos Pexegos sufriu nos últimos días unha nova rotura de tubaxe que deixou sen subministración a numerosos fogares. Trátase dun episodio máis nunha situación que, segundo denuncian os veciños, se repite con frecuencia pola rede de canalizacións construída nos anos 50, xa obsoleta.
Desde UCIN Santiago sinalan que o Concello non está a ofrecer unha solución definitiva e que se limita a reparar as avarías de maneira puntual. A formación asegura que o goberno local segue sen avanzar no novo contrato da auga, nin tampouco na planificación de obras de renovación, e advirte que “todo apunta a que nesta lexislatura non se presentarán sequera os pregos para actualizar este servizo esencial”.
O coordinador local de UCIN, Diego Adrián Mallo, afirmou que “os veciños dos Pexegos non precisan máis parches, precisan un proxecto de futuro”. O partido considera que os problemas do barrio van máis aló da rede de abastecemento e inclúen deficiencias en seguridade viaria, mobilidade, circulación e aparcamento.
Ante esta situación, UCIN comprométese a impulsar un proxecto integral de mellora para os Pexegos, que inclúa a renovación completa da rede de auga, a modernización das infraestruturas e medidas específicas para o tráfico e a seguridade cidadá.
