Os concelleiros do Partido Popular en Santiago, Olaya Otero e José Ramón de la Fuente, visitaron esta semana os accesos ao colexio Quiroga Palacios, onde denunciaron “a falta de seguridade coa que alumnos, nais, pais e o resto da comunidade educativa teñen que convivir a diario para acceder ao centro a pé”.
Os edís populares lembraron que o curso escolar está a piques de comezar e solicitaron ao executivo local que actúe con urxencia. Entre as medidas que propoñen está a limpeza e roza da maleza que invade parte da calzada e a reserva de espazos para o tránsito peonil, co obxectivo de reducir o risco de accidentes.
Segundo explicou De la Fuente, as familias que se desprazan a pé desde Volta do Castro, Choupana ou Santa Marta deben realizar un percorrido “cheo de dificultades, xa que en boa parte teñen que camiñar pola vía compartindo espazo cos vehículos”. Pola súa banda, Otero incidiu en que “en determinados treitos sería necesaria unha intervención máis profunda, pero noutros bastaría cunha limpeza axeitada para mellorar a seguridade”.
As queixas céntranse nas rúas Conxo de Arriba, Monte de Conxo e Travesía da Poza, así como no camiño estreito que enlaza estas vías e que desemboca directamente na estrada de Monte de Conxo. Esta situación, sen beirarrúas nin beiravías, obriga aos escolares a saír directamente á calzada, un feito que se agrava nas horas punta de entrada e saída do centro, cando se concentran numerosos vehículos na zona.
