O Grupo Municipal Socialista levará ao Pleno do Concello de Santiago unha proposta para demandar unha intervención urxente nas beirarrúas do barrio de Fontiñas, tras constatar o seu mal estado durante unha visita recente. Segundo trasladou o voceiro socialista Gumersindo Guinarte, a situación é especialmente grave na rúa Roma, pero tamén afecta a outras zonas como a rúa Berlín, a rúa Lisboa e o Paseo das Hortensias.
A problemática está causada polas raíces dos plátanos de sombra, que ao medrar deforman o pavimento das beirarrúas. Esta situación dificulta o paso peonil e supón un risco evidente, sobre todo para persoas maiores ou con mobilidade reducida. “As beirarrúas son practicamente intransitables en varios puntos do barrio”, advertiu Guinarte.
A través da proposición que será debatida neste mes de xullo, o grupo socialista solicita ao Goberno municipal, encabezado por Goretti Sanmartín, que elabore un plan de actuación por fases. Este debería incluír tanto a substitución das especies arbóreas actuais por outras máis apropiadas para contornas urbanas, como a renovación integral do pavimento das beirarrúas afectadas.
“O Goberno debe actuar xa para frear o deterioro dun barrio que é un exemplo de bo urbanismo e cuxos veciños e veciñas merecen un entorno coidado, seguro e digno”, concluíu o voceiro do PSdeG, subliñando a necesidade de recuperar a accesibilidade e a seguridade nas rúas de Fontiñas.
