A corporación municipal de Santiago de Compostela acordou este xoves reprobar ao presidente da Deputación da Coruña, Valentín González Formoso, tras o seu respaldo a inicios de xuño á creación dunha Facultade de Medicina na capital provincial. Con todo, a proposta só recibiu o ‘si’ dos edís non adscritos –expulsados do PSOE, partido ao que pertence Formoso–, mentres que os partidos do Goberno local (BNG e Compostela Aberta), o PSOE e o PP abstivéronse.
As formacións que expresaron abstención reafirmáronse na declaración institucional aprobada no anterior pleno, pola que a corporación municipal mostrou o seu “rexeitamento” á creación dun novo grao de Medicina en Galicia. Nas súas intervencións, o PP lanzou acusacións de “uso partidista” a esta proposición, mentres que o Goberno local preferiu non profundar na cuestión da reprobación.
Neste caso, a proposición partiu do grupo dos concelleiros non adscritos, en referencia a declaracións realizadas por Formoso o 9 de xuño aos medios de comunicación. Naquel momento, defendeu a implantación dunha Facultade de Medicina na cidade herculina. “Hai unha demanda da sociedade de maior ampliación do persoal de médicos que agora se desatende”, sinalou.
A edila non adscrita Mercedes Rosón recriminou este respaldo: “Non é asumible desde o punto de vista institucional que o presidente da Deputación, e por tanto representante da cidadanía de Santiago, adopte unha postura en contra dos intereses de Compostela”. “O presidente da Deputación apoiou publicamente a iniciativa da UDC, en contra do que dicía o seu partido neste Concello, en contra do que recomendan os especialistas docentes e en contra tamén do que marca o sentido común”, continuou a concelleira, que solicitou xunto ao resto de non adscritos a reprobación de Formoso.
ABSTENCIÓN
A portavoz municipal, Míriam Louzao, cuxa intervención foi a máis breve a este respecto, limitouse a reafirmar o apoio do Goberno local á declaración institucional asinada unanimemente pola corporación. “Isto de hoxe non vai nin de Medicina, nin vai da súa facultade. Isto vai doutra cousa. Sabémolo todos e nós non imos entrar”, engadiu. Pola súa banda, o PP acusou directamente aos edís non adscritos do “uso partidista” desta proposición e de introducir a cuestión relativa a Medicina entre as súas “guerras internas” co PSOE. “Trae vostede esta moción que parece máis unha ‘vendetta’ das súas antigas compañeiras”, acusou o popular Borja Verea.
“A nós non nos parece serio. O prestixio da Facultade de Medicina ten que estar por enriba das súas liortas co PSOE, cos seus antigos dirixentes”, continuou o portavoz do PP en Santiago. Así mesmo, o portavoz socialista, Gumersindo Guinarte, reforzou o seu apoio ao “rexeitamento” mostrado pola corporación municipal no anterior pleno: “A nosa posición é a da declaración institucional asinada hai 20 días”. Desta forma, considerou que o presidente da Deputación debería ser reprobado no pleno da corporación provincial, en lugar de no municipal.
