A corporación municipal de Santiago de Compostela aprobou en pleno –coa abstención do Partido Popular– a proposta de concesión de títulos e distincións a tres figuras históricas, entre elas o Irmán Mariano; o último alcalde de Enfesta, Manuel Balado, e o sindicalista e vítima do franquismo recoñecida polo Estado, Xosé Ramón Reboiras (coñecido como Moncho Reboiras). A proposta saíu adiante a pesar da abstención e críticas do PP, centradas especialmente na figura de Reboiras, sobre o que cuestionou a súa vinculación coa cidade. Así, acusou ao Goberno local de facer un uso “partidista” destas condecoracións.
Segundo a exposición desta figura realizada pola alcaldesa, Goretti Sanmartín, aínda que Reboiras naceu en Dodro, si ten vinculación coa capital galega. Tívoa a través a súa colaboración coa asociación cultural O Galo, o movemento estudantil e a loita sindical antifranquista. Ademais, a rexedora subliñou o seu carácter como “última vítima mortal do franquismo” en Galicia. O PP afeou levar ao pleno municipal esta cuestión sen contar co apoio unánime da corporación. “Na Comisión de honras e distincións nada se votaba porque nada se sometía á consideración do voto maioritario se non había unanimidade”, expuxo o edil popular José Antonio Constenla.
“Todos aceptabamos esa regra de xogo porque entendiamos que o acordo plenario era unha cuestión de trámite porque se traballou antes”, continuou. Pola súa banda, a alcaldesa defendeu que, ante a petición da formación popular, a vinculación de Reboiras con Santiago quedou “máis que acreditada”. Así mesmo, considera “difícil de entender” a postura deste grupo da oposición, xa que ata en dúas ocasións anteriores esta iniciativa “non tivo absolutamente ningunha palabra en contra”.
A postura do Goberno local sobre Reboiras contou, ademais, co apoio socialista. O edil Gumersindo Guinarte defendeu a vinculación do sindicalista coa cidade: “Para os que eramos xa estudantes e tiñamos algunha conciencia política nos finais dos 70, Moncho Reboiras estaba moi presente nas rúas de Compostela”.
