Os catro edís de Santiago expulsados do PSOE –Gonzalo Muíños, Mercedes Rosón, Mila Castro e Marta Álvarez– esixen que se revise o seu caso que foi asinado en última instancia por Santos Cerdán, cando era secretario de Organización, agora envolvido nunha suposta trama de corrupción no seo do partido. Demandan que se avalíe na auditoría externa anunciada polo líder socialista, Pedro Sánchez.
Nun comunicado, lamentan a “imaxe decepcionante” que se traslada do PSOE por unhas “presuntas prácticas que se sitúan nas antípodas da exemplaridade política”. Tamén lembra que foi Cerdán quen asinou a súa expulsión, tras ser ratificada por delegación do Comité de Ética e Garantías do PSOE. “É oportuno sinalar que non foi convocado todo o Comité, senón só dúas persoas do mesmo para acelerar a decisión de expulsión do partido, unha celeridade que non vemos na expulsión, por exemplo, do aínda militante socialista, José Luís Ábalos”, reprochan.
Esperan que na auditoría anunciada se analicen as contas do partido e “as actuacións que executou o xa exsecretario de Organización”, Santos Cerdán, polo que remitirán unha carta ao secretario xeral do PSOE, Pedro Sánchez, para que se revise o seu expediente de expulsión. Demandan analizar “as irregularidades que se produciron, tanto na tramitación dos expedientes como nos intentos previos de deslegitimación do Grupo Municipal Socialista e, mesmo, na elección do secretario xeral local, Aitor Bouza Dócil, así como a súa Comisión Executiva Municipal”.
Ademais, acusan dunha “afiliación masiva de dubidosa legalidade” con carácter previo á “elección da Comisión Executiva Municipal, integrada por Aitor Bouza Manso, Marta Álvarez-Santullano ou Pedro Blanco, entre outros”. Afirman que un día antes de pecharse o censo electoral comunicáronse 35 novas altas, o 10 % do censo. De feito, os edís expulsados sosteñen que o por entón secretario de Organización, Santos Cerdán, “coñecía tamén o sucedido coas afiliacións masivas, xa que, nas alegacións presentadas ante Ferraz, recibiu as probas documentais que así o demostraban”.
