A alcaldesa de Santiago, Goretti Sanmartín, solicitou ao Goberno central “todas as explicacións pertinentes” sobre as informacións que motivaron a dimisión de Santos Cerdán a raíz do informe presentado pola Unidade Central Operativa (UCO) no que se lle asociaba cunha presunta trama de cobro de comisións por obra pública. Preguntada polos medios de comunicación durante un acto deste venres, Sanmartín defendeu a “tolerancia cero” á corrupción e reclamou que “todas as organizacións políticas e administracións teñen que ter un comportamento ético”.
Ante estes feitos, a mandataria municipal mostrou a súa preocupación pola “desafección política” que causa que se coñezan casos coma este. “Realmente ao final acaba creando unha perspectiva dunha instalación de corrupción dentro das administracións que creo que é moi negativa para o funcionamento público e para as novas xeracións” afirmou Sanmartín. Finalmente, concluíu demandando “transparencia total” e subliñou que o presidente estatal “ten que facer gala desa transparencia”.
OUTRAS CUESTIÓNS
A alcaldesa instou asimesmo a asumir unha “posición de país” en materia de transporte aéreo e a “tomar as rendas” dunha política de complementariedade e especialización para os aeroportos galegos, especialmente o da capital, que cualificou como “de referencia e máis relevante a nivel galego”.
A rexedora foi preguntada pola prensa pola posible caída de pasaxeiros rexistrada no aeroporto de Santiago-Rosalía de Castro durante o mes de maio, tras unha etapa prolongada de cifras positivas. “Despois duns datos magníficos, tiña que haber unha parada”, sinalou Sanmartín, quen apuntou que o Concello xa advertira dunha eventual ralentización. A alcaldesa relacionou este descenso co aumento de usuarios da nova estación de tren intermodal, recentemente inaugurada na cidade, o que estaría provocando un desprazamento parcial do fluxo de viaxeiros ao transporte ferroviario.
Neste contexto, reclamou unha visión global e coordinada entre administracións que permita planificar os usos dos tres aeroportos galegos —Santiago, Vigo e A Coruña— desde unha lóxica de complementariedade e non de competencia interna. A súa proposta vai dirixida a reforzar o papel da terminal compostelá como principal infraestrutura aérea de Galicia, á vez que se aproveitan as conexións doutros medios de transporte.
En relación a outras cuestións da actualidade municipal, Sanmartín referiuse tamén á polémica arredor do parque comarcal de bombeiros de Ames, cuxa posta en marcha continúa sen concretarse malia estar anunciada desde hai meses. Respondeu así ás críticas do alcalde de Ames, Blas García, quen lamentou publicamente a falta de avances no proxecto. A alcaldesa compostelá pediu “paciencia” e asegurou que se están ultimando “os últimos detalles”, polo que agarda que “en breves haxa unha solución definitiva para encamiñar o problema”.
