A Xunta de Goberno Local do Concello de Santiago aprobou este luns varios asuntos destacados no ámbito urbanístico e de equipamentos municipais. A concelleira Míriam Louzao e o concelleiro de Urbanismo, Iago Lestegás, detallaron os acordos nunha comparecencia conxunta.
Un dos puntos máis salientables é a rehabilitación das fachadas e mellora da evacuación do Centro Sociocultural ‘Xosé Saramago’, no barrio de Vite, afectado por filtracións, condensación e deterioro dos materiais exteriores. A intervención inclúe a instalación dun novo sistema de illamento térmico e unha saída de emerxencia que permitirá utilizar todo o aforo do salón de actos, que conta con 180 metros cadrados e capacidade para 360 persoas. O orzamento da actuación ascende a 303.807 euros e o prazo previsto de execución será de 60 días hábiles.
No relativo ao uso das instalacións deportivas municipais, a Xunta de Goberno deu luz verde á convocatoria para a asignación de espazos da tempada 2025-2026, que poderá ser solicitada por entidades rexistradas no municipio, federacións e deportistas con licenza. Os criterios de adxudicación priorizarán actividades para persoas con discapacidade, deporte federado e escolar, e por último actividades recreativas.
Pola súa banda, o concelleiro Iago Lestegás informou da concesión de tres novas licenzas de obra maior: a construción dun edificio de catro vivendas e un local comercial en Pontepedriña, e dúas actuacións de mellora da envolvente e eficiencia enerxética nas rúas San Xoán e Rosalía de Castro.
Outro punto clave foi a aprobación do Plan Director do Conxunto Monástico de San Martiño Pinario, promovido polo Arcebispado de Santiago. O documento contempla intervencións para recuperar espazos orixinais, mellorar a accesibilidade e renovar instalacións, cun orzamento total previsto de máis de 15 millóns de euros a executar a medio e longo prazo. Entre as actuacións salientables atópase a retirada dun depósito de auga construído nos anos 40 e a recuperación dos corredores do claustro das oficinas.
Ademais, o Goberno local aprobou provisionalmente o Plan Especial de Infraestruturas e Dotacións na Choupana, onde se situará o novo edificio do Instituto de Investigación Sanitaria de Santiago (IDIS). Este plan afecta unha parcela de 5.217 metros cadrados, propiedade maioritaria da Compañía de Xesús, e prevé a construción dun edificio en tres volumes con cubertas vexetais integradas na paisaxe. O investimento estimado é de 5,8 millóns de euros, asumidos pola Fundación Pública Galega IDIS. A localización, entre o CHUS e o futuro campus da saúde da USC, facilitará a integración das instalacións que agora están dispersas.
O plan será enviado agora á Dirección Xeral de Urbanismo da Xunta para a súa avaliación antes da aprobación definitiva, que corresponderá ao Pleno.
