O voceiro do Partido Popular de Santiago, Borja Verea, cargou este martes contra a coalición de goberno formada por BNG, Compostela Aberta e PSdeG, á que responsabilizou de dez anos de parálise no servizo de transporte urbano. Fíxoo durante o pleno municipal, onde centrou os seus reproches na figura do concelleiro de Mobilidade, Xan Duro, a quen acusou de non ter avanzado na renovación do servizo desde o seu regreso ao executivo local hai dous anos.
Segundo Verea, o edil nacionalista xa fora o encargado do contrato entre 2015 e 2019, e nos dous últimos anos “non houbo nin un só paso adiante”, o que, ao seu xuízo, sitúa a súa responsabilidade directa nun período que abrangue entre seis e dez anos. “O único que fixo foi borrar todo e comezar de cero”, afirmou o líder popular, quen lle reprochou que dixese exactamente iso tras anunciar a licitación dun novo contrato de autobús urbano, esta vez como contrato de servizos e non como concesión.
Durante a súa intervención, Verea foi máis alá e pediu a dimisión de Duro. “Co aprecio persoal que lle teño, vostede tiña que terlle pedido desculpas aos santiagueses, recoñecer que se equivocou, e marchar”, declarou, engadindo que “a dignidade política só tiña un camiño, e era a porta de saída”.
CRÍTICAS Á ALCALDESA E AOS SOCIOS DE GOBERNO
O voceiro do PP tamén apuntou á alcaldesa Goretti Sanmartín e ao funcionamento xeral do goberno local. Aproveitou a polémica xerada arredor dunha factura de arredor de 500.000 euros para o alugueiro de autobuses, incluída no pleno municipal deste martes e rexeitada polo exsocialista e agora concelleiro non adscrito Gonzalo Muiños, para criticar a falta de cohesión do goberno local.
“Non é un goberno, é un circo que vostede dirixe”, declarou dirixíndose a Sanmartín. “Nin sequera os seus socios de goberno son quen de aprobarlle as súas propias trapalladas”, engadiu, en alusión á negativa de Muiños a aprobar o pagamento que cualificou de “irregular”.
Verea concluíu asegurando que o PP “non colaborará para tapar o desgoberno” e instou á rexedora a “poñer orde no seu pacto de gobernabilidade e facer que a cidade funcione”.
