O Grupo Parlamentario Socialista presentou esta semana unha batería de iniciativas no Parlamento de Galicia co obxectivo de reclamar á Xunta unha “solución inmediata” que evite a desaparición do máster en Matemáticas da Universidade de Santiago de Compostela. A medida chega tras un encontro entre o deputado Julio Abalde, tamén secretario de Universidades e Ciencia do PSdeG, e representantes da Plataforma en Defensa do Mestrado en Matemáticas da USC, preocupados pola continuidade desta formación de posgrao.
Segundo denunciou Abalde, se non se corrixe a situación, o sistema universitario galego verase privado da única liña completa de estudos en Matemáticas —grao, máster e doutoramento—, o que suporía, na súa opinión, “un grave retroceso” no mapa de titulacións do Sistema Universitario de Galicia (SUG). “O máster non pode valorarse só polos datos de matrícula. Hai que considerar tamén a súa relevancia estratéxica e o seu papel como vía de acceso á investigación”, explicou o deputado socialista.
O PSdeG considera que a decisión da Xunta, gobernada polo Partido Popular, de suprimir o mestrado baseándose no baixo número de estudantes matriculados, non ten en conta os criterios cualitativos, como a conexión desta titulación con liñas de investigación de recoñecida excelencia, tanto a nivel nacional como internacional. Estas liñas están ligadas ao corpo docente da USC e constitúen, segundo os socialistas, “un activo esencial para o futuro científico e tecnolóxico de Galicia”.
Ademais, Abalde advertiu que a eliminación do máster podería “xerar un agravio comparativo” coas universidades privadas, que si poden manter ou mesmo ampliar titulacións similares. Neste contexto, o parlamentario tamén reclamou unha revisión do actual decreto de titulacións do SUG, que segundo dixo provocou “problemas graves” nalgúns campus periféricos, como o de Lugo.
A plataforma cidadá que defende a continuidade do mestrado leva semanas denunciando publicamente a situación e recabando apoios institucionais e académicos. O PSdeG comprometeuse a trasladar esta preocupación ao Parlamento galego e a facer seguimento do asunto para evitar o desmantelamento progresivo da oferta pública en Matemáticas.
