Santiago de Compostela celebra este xoves o centenario da anexión do municipio de Conxo, un barrio que aínda agora continúa sendo “icona de rebeldía, do inconformismo e do activismo social e cultural” da capital galega.
Así o sinalou a alcaldesa da cidade, Goretti Sanmartín, nun pleno extraordinario do Concello para lembrar esta efeméride que permite celebrar a “singularidade” do barrio de Conxo e “todo o que achegou e achegará” a Santiago. A rexedora rememorou os 90 anos que este barrio foi un municipio independente, entre 1835 e 1925. Así, destacou o seu pasado “de reivindicación”, latente aínda no presente a través das diferentes actividades que se desenvolven nas súas rúas “ao longo do ano”.
Ademais, Sanmartín lembrou que Rosalía de Castro naceu en Camiño Novo, no extinto concello de Conxo, e agora é lembrada como unha muller “enérxica e reivindicadora da súa liberdade e a emancipación feminina”. Tamén se referiu ao Banquete Democrático do 2 de maio de 1856, unha comida “de confraternidade, sen clases sociais”, que se volverá a celebrar o próximo fin de semana; e á apertura do psiquiátrico en 1885.
PELEXA CONTRA O URBANISMO DEPREDADOR
Posteriormente, tras a súa anexión, o barrio pelexou durante o franquismo “contra o urbanismo máis depredador dos anos 60 que se cebaba coas propiedades máis humildes”, dixo Sanmartín. De aí naceu un movemento veciñal que se reflicte aínda hoxe, como unha das zonas de Santiago “de maior actividade”. “A historia de Conxo é rica, moi viva e non deixa de escribirse. As cousas cambiaron moito desde 1925, o barrio creceu, moita xente marchou e outro moita veu para quedar. E é que, como toda Compostela, sodes un barrio acolledor”, proclamou a alcaldesa.
Pola súa banda, no mesmo acto, o portavoz municipal do PP, Borja Vereal, agradeceu a organización deste “aniversario tan emocionante” para celebrar a “historia dun éxito”, como o é a de Conxo, e de “un exemplo” de “xenerosidade”.
