A conselleira de Vivenda e Planificación de Infraestruturas, María Martínez Allegue, asegurou que a Xunta “está en contra do intervencionismo, prohibición e a gravación” a vivendas baleiras. “Nós estamos en contra do intervencionismo, prohibición e gravación. Agora ben, todas as medidas que sexa postas por parte das administracións, tanto Xunta como concellos, para paliar este problema son benvidas”, apuntou nunha entrevista na Cadena Ser recollida por Europa Press.
Todo iso, despois de que o Concello de Santiago anunciase, este venres, un gravame fiscal ás vivendas baleiras con carácter permanente –que pode ser de entre un 50 % e un 150–. Neste sentido, Allegue fixo referencia ás diferentes liñas de axudas da Xunta en materia de vivenda e tamén apostou por incentivar a construción de vivenda pública. A conselleira tamén se mostrou crítica coa Lei estatal de vivenda e, neste sentido, foi cuestionada sobre o teléfono que a Xunta habilitou para consultas de cidadáns.
Neste sentido, asegurou que as chamadas “son moi diversas” e “non son só por problemas de ocupación de lanzamento, senón por problemas vinculados”. Só un 3 % das chamadas realizadas durante 2024 foron en relación con ocupacións. Con todo, a conselleira incidiu en que aínda que as chamadas “non son moitas, non significa que non exista un problema real”. Con esa ferramenta os cidadáns poden contactar directamente co Colexio de Avogados de Galicia.
DECLARACIÓN DA CORUÑA COMO TENSIONADA
Preguntada sobre a declaración da cidade da Coruña como zona residencial tensionada, a conselleira apuntou que “todos os indicios apuntan a que é posible que se declare como tensionada”. Con todo, explicou que a Xunta “está á espera” de que o Concello da Coruña presente diferentes documentos e, axiña que os reciban, os técnicos do IGVS traballarán para declarar a zona como tensionada ou non. “Se o Concello presenta documentación, pola nosa banda, os técnicos poranse a traballar para tramitar a resolución canto antes”, asegurou Allegue. Así mesmo, preguntada sobre se o Executivo autonómico recibiu algún tipo de petición deste tipo polo Concello de Santiago, a conselleira asegurou que “non recibiron ningunha solicitude formalmente”.
