A concelleira socialista Marta Abal denunciou publicamente este martes a situación do servizo municipal de madrugadores, logo de que o Concello de Santiago introducise cambios na forma de proporcionar os almorzos ao alumnado, eliminando a posibilidade de ofrecer alternativas ao menú establecido.
Segundo explicou Abal, tradicionalmente ofrecíase unha variedade de opcións ao longo da semana, incluíndo pezas de froita como alternativa aos postres, sen que iso supuxese un aumento no custe nin para a administración nin para a empresa concesionaria. A socialista criticou que, co novo criterio aplicado polo goberno local, se impón un cumprimento estrito dos pregos do contrato, o que está a provocar que nenos e nenas abandonen o servizo sen almorzar cando non lles gusta o prato ofertado.
“O menú é saudable e está ben pensado”, recoñeceu Abal, “pero non pode ser escusa para que menores vaian ao colexio sen comer. Iso é unha medida antipedagóxica e absurda”, asegurou. A edil socialista subliñou que o Concello ten a potestade legal de modificar o menú sempre que se respecte o equilibrio nutricional, segundo recollen os propios pregos do contrato.
Neste sentido, criticou que a resposta do goberno municipal sexa simplemente ‘cumprir os pregos’, sen atender ao impacto real que esa decisión ten sobre a saúde e o benestar do alumnado. “Resulta inaceptable que se estea a utilizar esa facultade como escusa para non dar resposta ás queixas das familias”, afirmou Abal.
Para o grupo municipal socialista, esta situación afecta negativamente aos dereitos dos menores e pon en cuestión o modelo de atención educativa do Concello. Por iso, a concelleira reclamou á responsable municipal de educación que “actúe con cordura e sentido común” e modifique de inmediato a xestión do servizo para evitar que haxa menores que queden sen almorzar nas aulas.
